Z Dešna/Dissen. Pópšawem by lětosa na 23. februarje wjeliki zapust był. Ale južo łoni su se wóženjone a młodostne pśeśiwo jubilejnemu zapustoju rozsuźili. Wjeliki zapust, źož wšykne gromaźe w pśeśěgu du, buźo 2030 k 150. zapustoju.

Ceło pó nałogu, tak ako to su južo wótere generacije cynili, jo se zachopił zapustojski kóńc tyźenja pětk z cysćenim połmjaseca. Dešańske su te jadnučke w Dolnej Łužycy, kótarež nose klinkotawu prězy sobu w pśeśěgu. Sobotu jo šło dalej ze camprowanim. How su se na to źaržali, co jo se w slědnem lěśe ako wužytne wupokazało. Camprowarje a camprowaŕki su se na zachopjeńku źělili do dweju kupkowu a su śěgnuli z dwěma kapałoma pó jsy. Pózdźej jo to w jadnej wjelikej kupce dalej šło. Wjacor jo zagrał DJ Jannis a jo se starał za połny „Serbski dwór“.