Z Barbuka/Bärenbrück. Sobotu, 8. februara, jo Barbuk swój lětosny zapustowy pśeśěg pśewjadł. Tśi tyźenja do togo su Barbukarje tradicionelnje pó jsy camprowali a pón jo skóńcnje zapust na rěźe był.

Kaž w wšych jsach, dajo na dnjach do togo wjele pśigótowaś. Dokulaž zal něgajšnego gósćeńca njestoj wěcej ako městno za zarědowanja k dispoziciji, musy Barbuk sebje južo někotare lěta ze stanom wupomagaś. Teke gaž jo źinsa južo wjele móžno, póbitujo pak wutopjony zal lěpšu móžnosć toś taki wejsny swěźeń swěśiś.