Z Města/Cottbus. Wy lubujośo serbsku rěc, sćo bejnje narske a wugódajośo raźi gódańka? Pón sćo wy, serbšćinarje 6. lětnika, how rowno pšawje … na „Detektiwnej góńtwje“. – Tak wabi Rěcny centrum WITAJ Chóśebuz z nowučkim projektom, kótaryž jo zachadne lěto koncipěrował.

Toś tomu napominanju su slědowali młode „detektiwki“ a „detektiwy“ ze zakładneje šule „Mina Witkojc“ Bórkowy a z Dolnoserbskego gymnaziuma Chóśebuz dnja 31. januara 2024.

Swójej ceptaŕce – Evelyn Zschörneckowu a Jennifer Dünnbierowu – su wóni ako „inspektorce“ sobu pśiwjadli. W Dolnoserbskem internaśe su dostali „Detektiwny běrow“, źož stej jich pśiwitałej „głowny komisar“ a jogo asistentka.