Z Łužyce/Lausitz. Južo pśed 500 lětami su bury protestěrowali. Burowe zběžki (Bauernaufstände) su se zachopili w lěśe 1524 w dalokich źělach Durinskeje, Sakskeje a w pódpołdnjowonimskich stronach. W 12 artiklach su wóni pominali danki pómjeńšyś a bonaŕstwo (Leibeigenschaft) wótpóraś. Teke źinsa, rozmjej w zachadnem tyźenju, su bury zasej protestěrowali pśeśiwo skrotcenjam kněžaŕstwa, kótarež jo se južo pó prědnem protesće w zachadnem lěśe kłoniło. Subwencioněrowanje za agrarny dizel dej se něnt pó etapach skrotcyś, ale nic wěcej naraz, kaž jo było planowane. Slědne pónjeźele jo se organizěrował w Chóśebuzu gwězdny jězd, kótaremuž jo se wjele rolnikarjow a srjejźnych pśedewześow pśizamknuło. Pśidatnje su slědny tyźeń rolnikarje pśijězdy k awtodrogam blokěrowali, aby wobchad wobgranicowali.