Z Mósta/Heinersbrück. Serbski wuběrk, ako wobstoj južo bejny cas pśi wokrejsnem sejmje Sprjewja-Nysa, pśewjeźo swóje pósejźenja za wětšy źěl tam, źož jo to serbske doma – to groni we jsach. Za slědny tyźeń srjodu běšo toś pśedsedaŕka Margit Neugebauerowa z Drjowka pśepšosyła cłonkow togo gremiuma a dalšnych gósći do gmejnskego centruma (něgajšna šula) w Mósće. Mjazy nimi su byli teke Michael Koch, ako jo we wokrejsnem zastojnstwje zagronity za šulstwo a kulturu, a Karin Tšukowa a Heike Apeltowa wót Domowiny. Wótmyslenje togo ga jo było, se raz bližej wopóznawaś ze serbskim žywjenim w tej wjelikej gmejnje w picańskem amśe, do kótarejež słušaju teke Groźišćo/Grötsch, Radowiza/Radewiese a Zawody/Sawoda.