Ze srjejźneje a Górneje Łužyce/Mittel- und Oberlausitz. Wót slědnego lěta pśewjeźo se w Lipsku na Instituśe za sorabistiku masterski studij za studentkow, ako su nabócnice a kśě byś ceptaŕki serbšćiny. To jo wjelgin chwalobna wěc. K studiumoju słušaju teke ekskursije. A 1. julija su se studentki ze swójima docentoma wudali na ekskursiju do srjejźneje Łužyce. Prědna stacija jo była Rowne a tam Njepilic dwór. Manfred Hermaš jo nam rědnje wulicował wó Hanzo Njepili a jogo pilnem źěle. Smy teke woglědali śpu Hanza Njepile a mału wustajeńcu. Dalej jo Juliana Kaulfürstowa, ako jo rěcna motiwatorka Domowiny pokazała wšake publikacije, ako pśedewšym wóna jo wudała w slěpjańskej narěcy a jo nam wó wšakich projektach wulicowała. Slěpjańsku góspódliwosć smy teke směli dožywiś z dobrym kafejom a samopjaconym tykańcom. Gromaźe smy pón zgłosyli spiwy w slěpjańskej narěcy.