Z Města/Chóśebuz. Slědnu wałtoru jo referent Zagronitego za serbske nastupnosći Kraja Bramborska Měto Nowak powědał k aktuelnym serbskim rěcnym pšawam a rěcnej politice w Bramborskej. To jo se w rumnosćach Šule za dolnoserbsku rěc a kulturu wótměło. Jadnab 20 woglědari jo k tomu pśišło.

Měto Nowak jo zespominał serbske politiske wuwiśe a jo rozkładował statkowanje na wšakich politiskich rowninach. Na pśikład jo Nimska organizěrowana na federatiwny part. Hynac ako we wětšynje europskich statow maju wšake kraje rozdźělny budget a teke wšake kazni. To teke nastupa Serbow w Bramborskej a Sakskej. Za toflicki na awtodrogach jo kraj zagronity, ale za toflicki pśi městach a jsach jich zastojnstwa, a gaž słušaju k sedleńskemu rumoju, njamógu nic pśeśiwo serbskemu wutoflickowanjeju cyniś.