Z Pšynego/Missen. Wesrjejź septembera jo se nowy semester za dolnoserbsku rěc a kulturu južo zachopił. Ako zachopk jo šula kazała na rěcny kurs wót 16. až do 18. septembera do starego gósćeńca w Pšynem pśi Wětošowje. Dogromady jo se źaseśo wobźělnikow pśizjawiło a jo kóńc tyźenja w zmysle serbskeje kultury a rěcy dožywiło.

Pó małej runźe pśedstajenja jo Gisela Christlowa (teke znata ako Błośańska Christlowa) pětk wjacor we swójom górkowem seminarje wó błośańskich górkach informěrowała. W burskej drastwje jo wóna na jadnem boce žortowała, ale na drugem boce teke zajmne wěcy wó sajźanju a pśeźěłanju górkow wulicyła. Z wopytowanim wšakich górkow a z pśedstajenim samo basnjonych spiwow jo to rozwjaselone nastajenje na kóńcu tyźenja było.