Barcelona. Ako som se 2019 wót UNESCO-konference za indigene rěcy w Kanaźe wrośił, jo z togo na kóncu projekt „Zorja“ wujšło. To pokažo, kak wažne jo, se z drugimi ludowymi kupkami a z wědomnosću wuměniś, gaž źo wó wóžwjenje rěcow. Togodla som se kradu wjaselił a ned pśigronił, ako jo mě Dr. Nicole Dołowy-Rybińska (asistencna profesorka za sociolinguistiku na Waršawskej uniwersiśe) pšašała, lěc comej „Zorju“ gromaźe pśedstajiś na mjazynarodnem kongresu za rewitalizaciju indigenych a mjěńšynowych rěcow w Katalońskej. Teke ten raz som zasej z wjele idejami, dobrymi kontaktami a lěpšym rozměśim rewitalizaciskich procesow domoj pśišeł.