Chóśebuz/Cottbus. Wěcej ako 50 gósći jo pśišło zachadny stwórtk do Dolnoserbskego internata, źož Rěcny centrum Witaj jo wugótował Źeń serbskich pedagogow a pedagogowkow. To su byli ceptarki, źiśownice, hortnarki, pedagogi Dolnoserbego internata a dalšne pódpěrarje serbskeje wucby. Wjednik Rěcnego centruma Witaj dr. Viktor Zakar jo pśedstajił sebje a źěło swójeje institucije: projekty, graśa, serbski timer, wucbne matrialije a nowu certifikaciju znaśow serbskeje rěcy. Wón jo se wuźěkował wšyknym za źěło – z głažkom sekta, rožu a małym darikom.

Na bliźe jo stojał žołty „postowy kašćik“, źož kuždy jo mógał spontanje łopjenko z dobreju radu, swójimi pokazkami, nowymi idejami abo žycenjami zatkaś. „Jadna ceptarka jo nam pśiraźiła, až někotare naše materialije za źiśownje a hort mógali se teke derje w šuli trjebaś“, jo nam Zakar na drugi źeń gronił.