Wěsće jo nowa Serbska Pratyja za lěto 2022 južo swóju drogu namakała do młogich domow a familijow w Dolnej Łužycy a nejskerjej teke w slěpjańskich stronach a w Górnej Łužycy. Młoge ga kužde lěto na toś te woblubowane knigły, na toś ten domacny kalendaŕ w dolnoserbskej maminej rěcy wjelgin cakaju. A pón južo wót septembra narski pšašaju, ga budu toś te knigły na pśedań. Tak jo to teke lětosa zasej było. Wósebnje narske a njeměrne ga su byli w Škódowje. Toś ta něga samostatna serbska wjas, ako słuša kaž Depsk, Žylow a druge jsy k Městoju, ga ma tu wjeliku cesć, až wóna mócnje sobu póstajijo wobraz a wopśimjeśe Serbskeje Pratyje lěta 2022.

Južo wót lěta 1997 ga ma redakcija Pratyje tu dobru ideju, w kuždem wudaśu jadnu serbsko-nimsku wjas wósebnje šyroko pśedstajiś – z fotami (mjazy drugim ned prědku na wobalce) a młogimi pśinoskami a artikelami ze staršego a nowšego casa. Prědny raz běchu se za to wupytali Drjenow a ako 26. wjas we tom rěźe jo tenraz Škódow na rěźe. Za lěto 2023 změjo Wjerbno tu cesć.