Z Grodka/Spremberg. Ako jo 1958 w Grodku roźony Eckbert Kwast hyšći w kólebankach lažał, drje njeby nichten jomu zwěšćelił, až wón by raz zawóstajił swóje slědy we łužyskej muzejowej krajinje. Ale pśisud w dwěma towarištnostnyma pórědoma jo swójske puśe šeł. Pó absolwěrowanju rozšyrjoneje wušeje šule jo wón studěrował mašinotwaŕstwo, ako diplomowy inženjer jo pśiwzeł źěło we płunowem kombinaśe w Carnej Plumpje. Ale pó politiskem pśewrośenju su śamne mroki se ześěgowali nad płunowym kombinatom, tamne pśichodowe šanse za młodych luźi su se rozpušćili.