Z Města/Cottbus. Pówołanje žurnalista zapśěgnjo wjele zajmnych temow a aktiwitow. Wšojadno lěc w radiju, w casniku, abo w telewiziji: Žurnalisty informeruju, wótekšywaju brizantne fakty a wózjawiju měnjenja.
Teke wukniki Dolnoserbskego gymnaziuma (DSG) w Chósebuzu se zajmuju za to pówołanje. Za lětnika jadnasćo a dwanasćo póbitujo DSG seminarny kurs „žurnalizm“, w kótaremž mógu se wukniki zaběraś z wjele wobłukami digitalnych medijow a printmedijow. Gromaźe z Antje Kelloweju, wucabnicu a wjednicu kursa, zaběraju se wukniki wósebnje ze serbskorěcnymi medijami.
W ramiku kursa su w zachadnem šulskem lěśe wšake filmy wó regionalnych temach nawjerśeli. Serbskorěcne filmy wulicuju na psikład wó serbskich awtorach, wó dobrowólnej wognjowej woborje w Žylowje, wó wjelkach w Bramborskej a wó korona-pandemiji. We tom projekśe su wukniki zběrali wjele nazgónjenjow a doglědow do žurnalistiskego źěła.