Glědajucy na to, až stej elektraŕnja (milinaŕnja) Janšojce a wuglowa jama wokoło rožka, njejo žeden źiw, až su kśěli wobźělniki wólbnego foruma wěźeś wót kandidatow a kandidatkow, kak to z wobyma dalej pójźo.

W programje kněžaŕstwa za strukturnu změnu we Łužycy ga jo wobzamknjone, až móžo milinaŕnja hyšći do lěta 2038 źěłaś. Co su kandidatki a kandidaty k tomu gronili?

Maja Wallsteinowa (SPD) jo groniła, až dej ten póstajony termin tak wóstaś. „My trjebamy ten cas, aby wšykno derje pśigótowali, wósebnje nowe źěłowe městna. Smy za to, až wóstanjo Łužyca dobry energijowy region.“

Kandidat Christian Görke(Lěwica), něgajšny bramborski ministaŕ za finance, jo gronił, až wón za ten termin stoj. Ale móžo byś, až buźo jěsnjej kóńc z wuglom we Łužycy. Mócnje kritizěrował jo, až se pjenjeze, ako su myslone za strukturnu změnu, wužywaju za projekty zwenka Łužyce. Pjenjeze su na pśikład wjelgin wažne za to, až se we Łužycy rozšyrijo seś za śěgi, na pśikład do Pólskeje.