Z Pódstupima/Potsdam. Pó powěsći bramborskego ministaŕstwa za rolnikaŕstwo, wobswět a klimašćit (MLUK) pokažo bilanca lěta 2020 jasnje na pśeměnjenje klimy.

Tak ako južo 2018, jo pśerězna temperatura lěta w Bramborskej wunjasła 10,8 stopnjow celsiusa. Jano 2019 jo gódnota z 11,1 stopnjow celsiusa wuša była. To su alarměrujuce gódnoty. Wót lěta 1881, ako jo zachopiło wobglědowanje temperaturow za Bramborsku, jo to nowy wjerašk. Sedym wót źaseśich nejwěcej śopłych lět su datěrowane mjazy 2000 a 2020. Glědajucy na póměrny pśeběg zachadnego stolěśa, jo taki wuslědk dramatiski. Felujucy dešć, pśepadowanje spódneje wódy a smjerś wegetacije se teke w Łužycy wustatkuju. Wuwijanje klimy škódujo wobswětoju, ale teke rolnikarjam a MLUK wótcakajo drastiske slědy za pśiduce lěta.