Z Dešna/Dissen. W lěśojskich prozninach pšose Domowniski muzej Dešno, srjejźowěkowy wobłuk pód gołym njebjom „Stary lud“ a Towaristwo pśirodowědnego centruma Sprjewiny ług z.t. (Naturkundezentrum Spreeaue e.V.) prozninske źiśi ze swójimi familijami na wšake póbitowanja. Take budu pśecej na tśich dnjach w kuždem prozninskem tyźenju.

Bóśonowe wjeźenja

Kuždu wałtoru wokoło zeger 11:00 a zeger 13:00 startuju wót pśirodowědnego centruma Sprjewiny ług bóśonowe wjeźenja, ako se tek za źiśi góźe. Bóśonowe młoźeta w Dešnje ga juž glědaju pśez kšomu gnězda. Wobźělenje płaśi za dorosćonych 4 euro a za źiśi 2,50 euro.

tel.: 035606 4290 30

www.spreeaue.eu

Drogowanje w casu znak

Kuždu srjodu směju źiśi a jich familije se wobźěliś na prozninskem programje na wobłuku pód gołym njebjom „Stary lud“. Zeger 11:00 a zeger 14:00 buźo tam wjeźenje, z kótarymž se pśedewzejo małe drogowanje do zachadnego casa – 1.000 lět slědk do srjejźowěka. Pśi tom móžo kužde góle wšake wěcki wuproběrowaś, na pśikład sam rucny młynk wjerśeś a tak z trajdy muku mlaś.