Z Bórkow/Burg. K nejwěcej woblubowanym zarědowanjam w Bórkowach słuša Dłujka noc wuměłstwa a rucnikaŕstwa na dwórach („Lange Nacht der Kunst- und Handwerkshöfe“). Lětosa by dnja 1. awgusta źasete jubilejne wudaśe togo zarědowanja se wótměło, ale dla z korona-pandemije zwisujucych póstajenjow su to wótgronili.

„Smy se ze wšyknymi wobźělnikami wobradowali a se rozsuźili, až njegótujomy tu Dłujku noc“, rozkładujo Nicole Schlengerowa, kótaraž we amśe Bórkowy/Błota wěcne pólo turizma nawjedujo. Maju tam ga nazgónjenje, až k tej Dłujkej nocy se pśecej bejny nawal woglědarjow pśinamakajo. A tak by śěžko było za jadnotliwych póbitowarjow wšykne te wobšyrne hygienowe a wótstawkowe napšawy pśesajźiś a doźaržaś.

We bórkojskem amśe su ako troštowanje pak teke južo na to pokazuju, až buźo póbobne zarědowanje z wjele regionalnym wuměłstwom, tradicionelnym rucnikaŕstwom a wšakimi kulinariskimi specialitami w zymje. Łoni su w Bórkowach ga prědny raz zarědowali „Adwent na dwórach“, a ten format kśě dalej wjasć.