Melina Kubista (22) studěrujo na Uniwersiśe Ludwiga Maximiliana w Münchenje germanistiku. W seminarje wó mjeńšynach w Nimskej jo wóna swój zajm wósebnje na serbsku mjeńšynu chyliła. „W Bayerskej lěbda něchten Serbow znajo. A to jo škóda,“ wóna wuzwignjo. „Ja mam to za wažne, až w cełej Nimskej wše mjeńšyny w Nimskej znate su. A Serby ga su jano how žywe, to jo něco wósebnego.“

Melina Kubista jo južo domacne źěło wó serbskej mjeńšynje napisała, a dokulaž jeje zajm na tej tematice tak wjeliki jo, jo sebje wótpowědnu temu za swójo bachelorowe źěło wubrała: Pśewjeźo w ramiku bachelorowego źěła slěźeński projekt k integraciji a k spěchowanju serbskeje mjeńšyny w Nimskej. Za to co pśirownaś mjeńšynowu politiku w Nimskej z wósobinskimi pósuźenjami serbskich žeńskich a muskich k tej temje.

Aby mógała to zrealizěrowaś, jo wuźěłała napšašnik, kenž se rozrědujo do wobłukow rěcnego a kulturnego spěchowanja, identity a politiki, pśi comž wósebny fokus na rěcnem źělu lažy.