Z Bórkow a z Budyšyna/Burg und Bautzen. Gmejna Bórkowy (Błota) a wokrejs Sprjewja-Nysa stej zachadny tyźeń gromaźe rozsuźiłej, až pśesunjotej lětosnu 13. Błośańsku powěsćowu noc, ako jo dejała se k swětkam wót 30. maja do 1. junija wótměś, na swětki lěta 2021. Akle pón budu dalšny kapitel z powěsćowego swěta wokoło serbskego krala na Groźe (Schlossberg) w Bórkowach prezentěrowaś. Južo šesty raz jo Serbski ludowy ansambel zagronity za głowny program. Za lětosa pśedwiźony kus z titelom „Wrośenje/Die Rückkehr“ z pjera Jěwy-Marje Čornakec změjo pótakem akle pśiduce lěto swóju premieru.

Kórty, ako su južo kupjone, wobchowaju swóju płaśiwosć. Ale komuž ten nowy termin casowje njepasujo, móžo je teke slědk daś. Móžno buźo to pak akle, gaž turistiska informacija w Domje gósći w Bórkowach zasej wótwórjona buźo.