Z Pódstupima/Potsdam. Srjodu tyźeń su startowali online-portal „Digitale Kultur in Brandenburg“, kenž jo ako pilotowy projekt źěl krajneje „Pśichodneje strategije Digitalna Bramborska“ za kulturny wobłuk. Jo gromadny projekt kulturnego ministaŕstwa Bramborskeje a DigitalAgentury Bramborska. Z tym pśiwołajo kulturna ministaŕka Manja Schülowa kulturnym akteram, aby toś to wirtuelne kulturne wikowanišćo z póbitowanjami połnili: „www.kultur-bb.digital jo našo wótegrono na koronu. Teke gaž zjawne koncerty su wumjelknuli, jawišća su prozne, filmowe zarědowanja se wótpowěźeli, cytanja se pśesunuli – kulturne žywjenje źo dalej. Na nowej platformje comy žywu kulturnu wjelerakosć našogo kraja digitalnje prezentěrowaś.“