Južo žedne lěta jězdźe wukniki 13. zakładneje šule w Zelenej Górje a wukniki Dolnoserbskego gymnaziuma jadne drugim na woglědy. Tu wuměnu (Austausch) organizěrujo Šula za dolnoserbsku rěc a kulturu, z pódpěru euroregiona Sprjewja-Nysa-Bobrawa. Lětosa, srjejź maja, su chóśebuske wukniki 9. klase pśebyli kóńc tyźenja w Pólskej.
Łužyska, pólska a ukrainska młoźina jo bydliła gromaźe we wjažkach we campje Nowy Dworek (pla města Schwiebus/Świebodzin). Na prědnem dnju su baslili ukrainske pupy, ako pśinjasu gluku. Take pupy su znate južo z casa 3.000 lět pśed Kristusom. A to te wobźělniki su nam napisali:
*
My smy baslili wšake sorty pupow. Jadna sorta su byli janźele, ak se gótuju wót tkanego płatu. Dalšna warianta jo ukrainska njewjesta. Ze sukna z ukrainskimi musterami smy napórali tej pupce suknicku. Hupac jo napórany wót pyšnych bantow, ak se pśiwěžu k wałmjecym copam. Wósebne jo, až pśi tom se njanałožuju žedne nožyce, žeden lim, žedna glicka, a wšo se wobwijo abo zwěžo jano z nitkami abo wałmu.
Alina Mjertynkojc (Merting)