Wěcej wó tom powědaś, co naše luźe wšykno gótuju a dojśpiju: To jo moto nowego rěda Nowego Casnika. We njom comy pśedstajiś Domowinske kupki a towaristwa ze swójimi luźimi a swójim zapalonym źěłom (1. źěl).

Chtož co spóznaś dešańsku domowinsku kupku, dej k njej woglědaś, gaž wóna źěła. Góźbow za to maśo pór razow wob lěto. Daś woplěwaju pomnik Bogumiła Šwjele we jsy, daś iniciěruju projekty k zeźaržanju dwórowych mjenjow abo woplěwaju row za rusojske wójaki. Zawěsće pilnje swěśe, gromaźe dojědu z błośańskeju tšochtu na Domowniski a drastwiny swěźeń w Bórkowach, maju swój muskecy zapust, campruju abo cołnuju w Błotach. Nowy Casnik jo k nim južo cesto woglědał. Slědna góźba jo była, ako su napjakli kopicu mazańcow. Te 12 mazańcow su pśedawali na swójom kokośe.