Trjebińska gmejna ma nowego šołtu. Waldemar Locke (CDU) z Miłoraza jo dostał pśi wuzwólowanju na 24. septemberu 316 głosow (= 52,9%). Tak ako w Trjebinje samem , tak teke we swójej rodnej jsy Miłorazu jo dobył wětšy źěł głosow. Druga kandidatka Ariane Krainkowa (My za Trjebin) jo dostała 281 głosow (47,1%). Wobźělenje na wuzwólowanju jo było wjelgin wusoke 85,1%. Nagromadu jo 770 wobydlari měło pšawo se na wuzwólowanju wobźěliś. Stakim buźo we pśichodu jaden Miłoraski, ak jo direktnje wót brunicoweje jamy pótrjefjony, gmejnu nawjedowaś. Wót jogo celow a myslenjow jo se z nim rozgranjał Andreas Kirschke.

Kněz Locke, kak sćo pśiwzeli rezultat wuzwólowanja?

Waldemar Locke: Na tom wjacoru som był wšen pśemóžony wót togo mě pódarjonego dowěrjenja. Mě jo se spódobało, až telik wobydlari jo se mysli gótowało dla wobeju kandidatowu a až telik jo jich swóju kśicku scyniło. Ja njok zatajiś, až to jo było wjelgin snadne dobyśe. Něnto jo za mnjo šym wažnjejše, až kuždy wobydlaŕ dej se cuś wušłyšany a sobu wezety a až zgromadnosć Miłoraza a Trjebina se mócujo.

Co budu te głowne temy Wašogo šołtowanja?