Źinsa comy našym lazowarjam a lubowarjam serbskeje rěcy pśirucyś dalšnu drogotku w interneśe: serbski program a druge pórucenja radija a telewizije rbb. Znate jo, až serbske radijo móžoš słyšaś live – kuždy źeń, z wuwześim soboty, zeger 12.00 (njeźelu poł štundy pózdźej) a wjacor hyšći raz zeger 19.00. Terminy TV-magacina Łužyca raz we mjasecu namakaju se tyźeń pjerwjej w Casniku.

Źinsajšny źeń njemusyš na gluku rowno we tom casu radijo abo telewiziju zašaltowaś. Serbski program rbb ga jo do interneta sajźony a z tym ceły cas pśistupny. Te normalne aktuelne radijowe wusćełanja (Sendungen) su 24 štundow online stajone, njeźelske wusćełanja ceły tyźeń, a młoźinski magacin Bubak dwa tyźenja – až do pśiducego wusćełanja. Małka słabosć jo, až pśisłuchaŕ musy cełe wusćełanje we jadnom słyšaś, a njamóžo sebje ten źěł wuzwóliś, ak jogo wósebnje interesěrujo. Wón njezgónijoprědku wen wót cogo jo we wusćełanju grono. Nanejmjenjej pla Bubaka jo krotko napisane, wó co we aktualnem wudaśu źo.