Z Města/Cottbus. Srjodu, 26. měrca, su se na Dolnoserbskem gymnaziumje w Chóśebuzu pśewjadli serbske kubłańske wiki, ga za wuknice a wuknikow 11. lětnika, aby wóni mógali wó pówołańskich móžnosćach w serbskem swěśe informěrowaś. Wšake serbske institucije su jim na městnje orientaciju bitowali a na jich pšašanja wótegronili. Teke zastupniki Bramborskeje techniskeje uniwersity Chóśebuz-Zły Komorow (BTU) su se na wikach wobźělili. BTU-wiceprezident za studium a wucbu prof. Peer Schmidt jo pśedstajił studium na ceptaŕstwo serbšćiny za zakładnu šulu, kenž se zachopijo lětosa w zymskem semestrje. Někotare zajmowane wuknice a wukniki jo wón mjazy jadnastkami nadejšeł.

Nowy Casnik bóžko njejo mógał se na kubłańskich wikach wobźěliś a se naźeja, až to w pśiducem lěśe zasej móžno buźo. Młodostne, kenž na nas pšašanja maju a se za našo źěło zajmuju, směju nas pśecej rady kontaktěrowaś.