Z Města/Cottbus. Dwa raza za sobu, 31. měrca a 1. apryla, su wukniki Dolnoserbskego gymnaziuma połnili žurlu Piccolo-źiwadła w Chóśebuzu. Dwanastkarje wót kursa za źiwadłowe graśe su prezentěrowali swój kus „Njespinany – ungebremst“.

Alkohol žrěś do koma, bulimija, wopojanosć wót konsuma – žedne lažke temy, kenž su młodostne prezentěrowali swójim sobuwuknikam, ceptarjam a starjejšym. Wobšyrnje su nacerili problemy, z kótarymiž se źinsajšna młoźina běźi.