Z Dešna/Dissen. Kužde lěto se zmakajo Młoźinski aktiw Domowiny pśed jatšami w Domowniskem muzeju w Dešnje. Młoźinski koordinator Tobias Unger jo zachadny stwórtk wugódnośił z wjednikami źaseś młoźinskich kupkow zapustojski cas.

Facit k zapustojskej sezonje 2025

Tobias Unger jo chwalił młodostnych za dobru organizaciju a pśewjeźenje zapustow w jich jsach. Pór kritiskich słowow jo pak teke dało. Njejo klapowało wšuźi z woblekańskim pórědom. Pśi źowćach su se wuměnili pumpse z turnaŕskimi crjejami. Ale teke pla gólcow njejo wšykno pśecej pó pšawem było. Tak jo ten jaden abo drugi nosył barwojte zgło abo krawatu z comicfigurami.

Młoźinske wjedniki by dejali w pśichoźe wěcej na to glědaś a rowno nowych cłonkow na to pokazaś, kótare drastwjenje jo póstajone. Teke dejali se cłonki młoźinow wěcej sensibilizěrowaś nastupajucy wuznam tych nałogow. Wušej togo jo to wažne, až susedne jsy se dogroniju, aby njeměli prěkowanje terminow.