Z Budyšyna/Bautzen. We wjelikem a rědnem zalu w domje Serbskego ludowego ansambla w Budyšynje zmakaju se cesćej wobydlarje z města a wokoliny, aby how dožywili rědnu serbsku kulturu – koncerty, balet, teater, chorowe spiwanja a druge. Slědnu sobotu, 5. apryla, pak su se how zgromaźili delegaty z 5 Domowinskich župow a 13 nadregionalnych serbskich towaristwow k swójej 23. głownej zgromaźinje wót lěta 1990. Mjazy tymi 110 Domowinaŕkami a Domowinarjami ze wšych stron serbskeje Łužyce su byli 26 z Dolneje Łužyce a 6 ze slěpjańskich stron. Dalej su se wobźělili na toś tom wjelgin wažnem Domowinskem zarědowanju wótpósłańce a zastupniki Nimskego zwězkowego sejma a sakskego parlamenta wót wšakich frakcijow, a dalšne politikarje ze Sakskeje su pósłali póstrowne pisma. Bóžko take z bramborskeje politiki pśišli njejsu. Ministaŕski prezident Michael Kretschmer běšo pśipowěźeł, až sam pśiźo do Budyšyna.