Z Janšojc/Jänschwalde. Jonas a Kaycee stej naš prědny kralojski pórik! Smy 27. septembra ze źiśimi w starstwje tśi až do šesć lět naš kokot w źiśowni Lutki w Janšojcach swěśili.

Ze źiśimi horta, źiśownje a ze starjejšymi smy za to juž srjodu wrota wobwili a cesne wěnki wili za naše „rejtarje“. Za to trjebne dubowe łopjena su pilne źěłaśerje gmejny wobstarali, kenž pśecej pomocniwe su. Kwětkowe struski za naše kralowki jo Diana Lauke, mějaŕka kwětkoweje pśekupnice „Vergiß mein nicht“ z Janšojc, sponserowała. „Für die Kinder mache ich das doch gerne“, jo wóna groniła a se wjelgin wjaseliła, až wóna móžo našu źiśownju pódpěraś. A źiśi su nazwucowali z nami dwě reji, dalej su zwucowali łapanje kokota a to karowanje žabow. Na dnju kokota jo se źaseś źowćow serbsku drastwu woblekało. Pśi tom smy pódpěru wót prastarkeje a starkeje źiśi a teke wót Rosi Tšukoweje, wjednice janšojskego muzeja, dostali. Tak su byli źowća spěšnje woblacone a teke gólcy su se wufajnowali. Starjejše su se mjaztym na swěśenišću schadowali a su mógali na nowu serbsku muziku wót RBB słuchaś.