Z Města/Cottbus. Sobotu jo se wótměł w Chóśebuzu 15. Serbski swěźeń w ramiku 31. měsćańskego swěźenja. Wót zeger dweju do zeger šesćich jo wjele luźi dožywiło na jawišću w Puschkinowem parku pyšny live-program ze šyrokeju paletu serbskeje kultury, raz tradicionelneje, raz cele nacasneje. Zachopk jo wugótował Serbski ansambel z programom „FOLKLORA“. Dalej jo gósći rozwjaseliła muzika mjazy drugim wót kupki nAund, Jacke Schwarz, raperja STOI abo noweje spiwaŕki Clara Valerie. Prědny raz jo teke akrobatika pódla była, ga duo „Tausendkünstler“ (Zejmišojc Manuel a Maren). Reje su se na pśikład prezentěrowali wót rejowańskeje kupki Barbuk, Zaspickeje źiśeceje rejowańskeje kupki abo Dolnoserbskeje kulturneje akademije.

Ale teke pśed jawišćom jo se młoge tšojło, a to za wšyknych k sobugótowanju. Lěc serbske ludowe reje pód nawjedowanim Georgija Marinowa abo spiwanje serbskich ludowych spiwow – Gregor Kliem, kenž jo gromaźe z Dianu Šejcoweju w nadawku Serbskego programa rbb moderěrował, jo to na nogi stajił.