Z Dešna/Dissen. Pónjeźele jo był Póraźujucy wuběrk za pšašanja serbskego luda pśi Zwězkowem ministaŕstwje nutśikownego a domownje (BMI) gósć w Dešnje, aby se na swójom pósejźenju z aktualnym połoženim serbskego luda zaběrał a wó pśiducem financnem dogronje Załožby za serbski lud powědał. To jo se stało pód wjednistwom społnomócnjoneje zwězkowego kněžaŕstwa za pšašanja wusedlarjow a narodne mjeńšyny Natalie Pawlikoweje, wótpósłańce Zwězkowego sejma. Wobźělili su se na pósejźenju mimo dalšnych wótpósłańcow Zwězkowego sejma a zastupnikow BMI mjazy drugim teke wjednik Mjeńšynowego sekretariata, zastupniki Załožby za serbski lud, zastupniki Domowiny a cłonki projekta „Zorja“. Cłonki wuběrka, kenž ma funkciju kontaktnego gremiuma, su se teke wó Zorjach informěrowali a wó tom kradu zagórjone byli. Dalej su něco zgónili wó stawiznach Serbow w Domowniskem muzeju a jogo wobłuku „Stary lud“ kaž teke w cerkwi.