Za ludowu kulturu se wěcej zajmujom někak dwě lěśi. Com samo pśiwdaś, ludowa kultura jo južo wažny źěl mójogo žywjenja. Procujom se nic jano pśiglědowaś, ale se teke wobźěliś, sobu spiwaś a rejowaś. Som žywy w Praze a mam gluku, až how mamy šyroke móžnosći ludowu kulturu dožywiś. Com spomnjeś na pśikład pšawidłowne zmakanja dweju morawskeju ludoweju kupkowu, slovácke a valašske, abo docełego njeformalne zmakanja z ludowymi spiwami a rejami, kótarymž se groni Folklorne mejdlo. Narodopisny muzej w Praze pśewjeźo kurs ludowych rejow (českich, morawskich a słowakskich) a kužde lěto se wotměwa wjelgin pisany a wjeseleraki morawski bal, teke bale drugich ludow, na pśikład Rusynow.