Ze Zaspow/Saspow. Camprowali su sobotu, dnja 28. januara, teke zasej zaspicke wobydlarje. Wósebnje aktiwne jo pśecej tudejše Drastwine a domowniske towaristwo pśi woplěwanju starych serbskich nałogow. Wušej dwaźasća dorosćonych a žedne źiśi w pisanych kostimach su měli swójo wjaselenje z dujaŕskeju muziku, cesneju rejku z wobydlarjami woglědanych dwórow a domow, dobrymi pśikuskami a paleńcom a pśi zběranju darow. 11. měrca planuju Zaspowarje lětosny zapust a to z reju w Škódowje w gósćeńcu wu Šyrgotojc. Pómałem se rozpowěda, až budu skóro teke wóswěśiś swój 180. zapust. Na pšawdosći jubilejnych zapustowych licbow na jsach wšak móžo se tam a zas cwiblowaś. Casy zepěraju se take lětolicby na znankstwo starych luźi, fotow abo w starych dokumentach a casnikach. Nałožk pak jo staršy.