Lube źiśi,

tuchylu dajo wjele swěźenjow. Wótergi wustupuju tam źiśi. Co jo pla was: Sćo wy we chorje? Rejujośo něźi? Źiśi we Wětošowje a Radušu to gótuju. Cytaj, cytajtej a cytajśo!

Atmosfera jo kradu wósebna była dnja 15. maja w Serbsko- nimskej cerkwi togo městaška. Tam jo był serbski koncert ze źiśimi. Hannelore Plegertowa, wóna jo pśedsedaŕka wětošojskego kulturnego towaristwa, jo wulicowała: „Pśed pěś lětami jo towaristwo pśišło na tu ideju, Witaj-źiśam z Raduša a Wětošowa někaki forum daś, źož mógu swóje znaśa serbskeje rěcy wětšemu publikumoju prezentěrowaś.“ Take něco su tu njeźelu w maju do statka stajili, rozmjej zgromadny koncert tych Witaj-źiśi a kupki „Drjewjanki“. To zarědowanje jo było wjeliki wuspěch. Starjejše, stare starjejše a druge gósći su se wjelgin wjaselili, dla togo, což su słyšali a wiźeli.