Z Dešna/Dissen. Łoni jo se kupka „Wjelike małkuše“ tudejšneje źiśownje „Wichtelland“ wobźěliła na wuměłskim wuběźowanju Rěcnego centruma Witaj k temje „Mójo nejlubše zwěrje“. Kužde góle jo namólowało zwěrje z palcami (Fingermaltechnik). Tak jo nastał zwěrjeńc. Za to su dostali prědne myto za nejlěpše kupkowe źěło. W slědnem casu jo było śěžko, termin za pśepódaśe namakaś. Skóńcnje su mógali źiśi myto pśiwześ. Pśisamem wšykne su byli pśibytne a wjasele jo było wjelike. Rěcny centrum Witaj jo zestajał drjewjany burski dwór ze zwěrjetami, z burowku a burom, pupcyckami za palce, měwański kašćik ako twaŕski set, knigły Hanocha „Wjasele na zwěrjetkach“, cd „Wroblik Frido a jogo pśijaśele“ Jěwy-Marje Čornakec a rědne wopismo. Na bildce su wiźeś źiśi z wótkubłaŕku.