Serbski muzej wutšobnje pśepšosyjo na Serbske blido srjodu, dnja 9. měrca, 2022 zeger 18:00, do Chóśebuza na Młyńsku drogu 12.,

Zarědowanje w dolnoserbskej rěcy zaběra se z tekstom serbskeje hymny „Rjana Łužyca“(Rědna Łužyca). Tekst jo zbasnił faraŕ Handrij Zejler a melodiju jo twórił komponist Korla Awgust Kocor. Z lěta 1923 spiwa se serbska hymna k wažnym pódawkam serbskego žywjenja. Gornoserbski tekst jo popojski kantor Hendrich Jordan do dolnoserbskeje rěcy pśestajił.

Někotare lěta pak se głose zwigaju, ako kritizěruju jadnu tekstowu linku w drugej štucce. Pśedsedaŕstwo Maćice Serbskeje jo togodla k zjawnej diskusiji napominał pód nadpismom: „Su jenož, ‚mužojo hódni wěčnoh wopomnjeća‘?“/ „Su jano muže gódne nimjernego spomnjeśa?“ Źo wó pšašanje, lěc dej se tekst serbskeje hymny změniś a jolic až, pón kak?

Pśedsedaŕ Domowiny Dawid Statnik wósobinski njeby toś tu pasažu hymny „wěcej pódpisał, dokulaž how ta lěpša połojca našogo luda felujo, te žeńske.“