Jsy Mrocna (Pretschen), Dołgi (Dolgen), Wjelike Linje (Groß Leine) a Lutol (Groß Leuthen) kśě z dobreju wólu k serbskemu sedleńskemu rumoju pśistupiś. Wóni su ze Serbskeju radu zgromadne póžedanje stajili. Na bilźe su wiźeś (wót lěwego boka): zastupna šołtowka gmejny Markojska góla Sylvia Mětakowa (Metag), pśedsedaŕ Serbskeje rady Torsten Mak, cłonka Serbskeje rady Uta Henšelowa a Wylem Janhoefer, zagronity za serbske nastupnosći we wokrejsu Damna–Błota Dieter Freihoff a zastupnik Mrocneje Günter Thiele.Foto: G. W.
Pódstupim/Potsdam. Zastupniki styrich jsow gmejny Markojska góla/Märkischheide – Mrocneje (Pretschen), Dołgow (Dolgen), Małego Linjego (Klein Leine) a Lutola (Groß Leuthen) – su stajili gromaźe ze Serbskeju radu to póžedanje, až kśě słušaś k oficielnemu serbskemu sedleńskemu rumoju. To jo se stało na wobradowanju Serbskeje rady we wjažy bramborskego parlamenta wałtoru tyźeń.
Tejerownosći stej wejsnej pśiraźe Hažowa (Haasow) a Wjelikich Dobryń (Groß Döbbern) w kopańskej gmejnje (Neuhausen) wobzamknułej, až kśe z dobreju wólu k serbskemu sedleńskemu rumoju słušaś. Jeju zastupniki pak njejsu do Pódstupima pśijěli. Wóni su wóne póžedanje pódpisali dwa dnja pózdźej w Serbskem domje w měsće.