Z Chóśebuza/Cottbus. Pśechójźowarje pśi Sprjewi su wiźeli wótpołdnja 8. awgusta njewšedny wobraz. Tak, ako su kśesćijanow dupili w casu Jezusa w Jordanje, tak jo se stało tam dupjenje w Sprjewi. Słyńco jo swěśiło, jo było śopło. Kati Sprigodojc jo była dupjeńc. Wóna jo cłonk w serbskej wósaźe a jo južo wobogaśiła serbske namše ze swójim spiwanim. Łoni jo narosło we njej žycenje, se dupiś daś. Impuls jo wujšeł z muzikaliskego pśewóźowanja dupjenja a pśez to, až jeje muzikaliski kolega Tim Šmit jo wulicował wót swójogo dupjenja. To póžedanje za dupjenim jo lětko zdrjało. Dupjenje w rěce jo było inspirěrowane pśez film „Maria Magdalena“, kótaryž jo ju dłymoko gnuł. Hartmut Leipner jo jej pśiraźił film w ramiku pśigótowanja zgromadneje nabóžniny. Za dupjenje jo se rozsuźiła za fararja Matthiasa Eßweina, dłujkolětnego pśijaśela. Dupjenje w rěce, z tym wón se derje wuznajo. Kati jo se to južo woglědała. Z jogo baptistiskeju wósadu w měsće Ratzeburg jo se Kati južo wopóznała a tam serbske kjarliže spiwała.