Z Tšupca/Straupitz. Jaden móžo groniś, až gano su se te tšojenja pla Zjadnośeństwa zajmow „Błośańska zeleznica“ kradu pśechytowali: Su měli slědny tyźeń ned dwa wjeraška za sobu. Pětk tyźeń jo se pśi něgajšnem dwórnišću Błośańskeje zeleznice w Tšupcu temowa kólasowaŕska ruta „Na slědach Błośańskeje zeleznice“ oficielnje wóswěśiła. Źeń pózdźej, sobotu, jo zjadnośeństwo zajmow pó wobšyrnem saněrowanju Muzej Błośańskeje zeleznice w Tšupcu zasej wótwóriło.