Z Baršća/Forst. Wótpósłane Wokrejsnego sejma Sprjewja-Nysa su 23. junija gromadu stupili. Na pósejźenju su teke wobradowali wó temach, kótarež su wažne za Serbow a za šulstwo docełego.

„Serbski“ stipendium buźo

Chto wó tom pśemyslijo a se nosy z dobreju myslicku, byś pózdźej raz ceptaŕka abo ceptaŕ za dolnoserbsku rěc, ten móžo něnt z tym licyś, až dostanjo wót wokrejsa Sprjewja/Nysa za to wjelgin dobru pódpěru. Pó dlejšych diskusijach a  wobradowanjach we młogich gremijach – mjazy drugim w głownem a serbskem wuběrku wokrejsnego sejma – su cłonki wokrejsnego sejma slědny tyźeń srjodu w Baršću skóńcnje wobzamknuli, až buźo wokrejs z wósebnym stipendiumom tych spěchowaś, ako kśě studěrowaś na serbsku ceptaŕku abo serbskego ceptarja. Wšykne pśibytne wótpósłańce su za to dali swój głos, jano dwa stej se głosa zdałej.