Z Města/Cottbus. Ten tuchylu w Dolnej Łužycy prezentěrowany tśi-krajowy wuměłski projekt „WOBRAZE KRAJINY. Pśechod 03“ ma we sebje duch solidarnosći mjazy słowjańskimi ludami, ga mjazy Dolnymi a Górnymi Serbami, Słowjeńcami a Korutańskimi Słowjeńcami. Jo to zwězujucy duch, zmysł za zwězowanja a zajm za situaciju togo drugego, ako jo to teke zastupił Toni Bruk. Ten znaty a zasłužbny serbski filmaŕ jo we łońskem decembrje wumrěł. Jogo film „Gaž rěc wumrějo – Korutańske Słowjeńce“ jo se srjodu tyźeń w chóśebuskem Serbskem muzeju we wopisowanem ramiku, kaž teke we wopomnjeśu na togo wójowarja za serbski grajny film, pokazał. Z tym filmom, kenž jo nastał w rěźe dokumentacijow Tonija Bruka wó małych rěcach we Europje 2006, jo ten filmaŕ se tegdy wó wobźělenje na projekśe „Pśechod“ procował. Dla dokumentaciskego charaktera filma njejo jury jen wuzwóliła.