Dnja 30. junija 1936 jo se naroźiła Keta Wunderowa w Prjawozu, chóśebuskem wokrejsu. Starjejšej stej měłej małke burske byśe. Serbsku rěc jo słyšała wšedny źeń, tak jo se jeje nasrěbała wót małego.

Wósym lět jo chójźiła do šule w Prjawozu, pśizamknuło jo se dwělětne pówołańske wukubłanje we Wjerbnje. Keta Wunderowa jo była kradu pilna a jo rada wuknuła. Tak jo se rozsuźiła hyś na ceptaŕstwo. Ale nic na někakežkuli, ně, na serbske. Na Wucabnikojskem instituśe w Małem Wjelkowje pla Budyšyna jo se kubłała na serbsku wucabnicu. Pótom jo wucyła źiśi zakładneje šule w Smogorjowje, Wjerbnje, Žylowje a Chóśebuzu. Teke serbsku rěc.

Bóžko njejo jeje głos tak kśěł sobu cyniś, ako by wóna rada měła. Jo musała wopśestaś ceptariś. Z tym jo jeje pedagogiska žywjeńska droga nejpjerwjej była kóńcoju. Ale jo namakała móžnosć na serbskem pólu dalej źěłaś, pśi Domowinje w Chóśebuzu. Pótom jo była pla Wokrejsneje rady Chóśebuz-kraj a pśi měsćańskem zastojnstwje w měsće.