Z Chrósćic/Crostwitz. Na swójom źěłowem pósejźenju 15. junija w Chrósćicach jo se sakska Rada za serbske nastupnosći głownje zaběrała z planami, póindustrielnu krajinu Łužyskego brunicowego rewěra ako swětowe derbstwo UNESCO zapisaś daś. Projektowej sobuźěłaśerja Fabian Jacobs ze Serbskego instituta a Lea Brönnerowa z Chóśebuskego Instituta for Heritage Management stej pśedstajiłej raźcam proces pśizjawjenja a su pódšmarnuli jadnoraznosć łužyskeje krajiny pó brunicy w globalnem pśirownanju. Pśi tom graju teke wucynki industrializacije w srjejźnej a Dolnej Łužycy na tamne tradicionelne serbske žywjenje a na serbsku kulturu a rěcne rumy wjeliku rolu. Raźce wiźe zwězanje industrijowych stawiznow Łužyce a serbskeje perspektiwy ako šansu za dalejwuwiśe regionalneje identity. Wóni kśě pšosbu wó pśipóznaśe ako swětowe derbstwo teke dla teje slězyny politiski pódpěraś.