Z Města/Cottbus. Južo wót łońskego nowembra maju w Bramborskem muzeju za moderne wuměłstwo w Chóśebuzu (Dizelowa milinaŕnja) wustajeńcu z titelom „Stich für Stich. Faden um Faden. Textile Bildräume“, źož se teke pokazuju twóŕby tekstileneje wuměłcowki Ellen Lehmannojc (1950–2016) z Wusokeje (Weißagk). Korona-lockdowna dla dlejšy cas njejo ta wustajeńca publikumoju pśistupna była. Ale: Wót 22. maja jo ten muzej zasej wótwórjony. Hyšći až do 5. septembra mógu se te w spomnjetej wustajeńcy pokazane wušywane abo tkane sćěnowe wobraze woglědaś. Te nejstarše tych twóŕbow su nastali w konteksće Bauhausa w 1930tych lět. K pózdźejšym twóŕbam, ako su se wuwili mjazy 1970tych lětami a źinsajšnym dnjom, słušaju teke twóŕby Ellen Lehmannojc, kótaraž jo była wobwliwowana wót Bauhausa. „Toś to tekstilowe wuměłstwo zjawijo wobrazowe rozměśe kaž we mólaŕstwje, na twóŕbach jo to derje wiźeś“, groni Ulrike Kremeierowa, direktorka muzeja, ako jo tu wustajeńcu zgromaźe z kustosom Ulrich Röthke na starosći měła.