Ze Zaspow/Saspow. Na Zaspickej głownej droze zastanišćo Zaspy, Fröbelowa droga, stoj wót 2. junija nowa busowa cakaŕnja. Skóńcnje su źiśi, kótarež jězdźe z busom do šule, šćitane pśed wětšom a dešćom, a njemuse wěcej w awtach na bus numer 20 cakaś. Njejo było tak jadnorje, ten busowy domcyk wót Chóśebuskego wobchada (Cottbusverkehr) dostaś.

„Wó to jo se lokalna pśirada wót lěta 2018 starała“, groni Heike Pšuskelowa, cłonk teje zaspickeje pśirady, a dodajo: „Ten busowy domcyk njejo nowy. To jo trjebany domcyk z Pódstupima, kótaryž pak wjelgin derje wuglěda, a móžo se how w Zaspach hyšći wužywaś.“ Nic jano wóna se wjaseli, až źiśi mógu tam něnto w suchem na bus cakaś. Teke drugim starjejšym se ten recyclowany busowy domcyk spódoba. Togodla su se Zaspicke na 8. junija zmakali na wuswěśenje cakaŕnje, z kafejom a tykańcom a limonadu. Něźi 20 luźi jo se wobźěliło. Nele, kenž teke wuknjo serbsku rěc, jo symboliski pśerěznuła banśik.

Škóda jo pśi wšom, až napismo na zastanišću njejo dwójorěcne, to groni serbsko-nimske, kaž su to na pśikład w Budyšynje a wokolinje na zastanišćach busow w zajźonych mjasecach cynili.