Junijowe wudaśe serbskego kulturnego casopisa Rozhlad bitujo zasej ten jaden abo drugi pśinosk, ako za Dolnoserba zawěsće zajmny jo. Na ten part ma se ako prědne pokazaś na interview, kenž jo wjadła Katrhin Čornakec, šefredaktorka Rozhlada, z Martinu Nowakojc, kuratorku chóśebuskego Serbskego muzeja. Wjelika tema we tom rozgronje jo modernizěrowanje togo muzeja. Wobswětlijotej se zawina a slězyna, cogodla jo dejał Serbski muzej w Chóśebuzu se wobnowiś. Jaden dypk we wótegronje Martiny Nowakojc, to se wě, se póśěgujo na nacasne techniki a medije. „Comy ga z casom hyś a na pśikład teke młody publikum dojśpiś.“ Dalej se pšaša za konceptom nowo wugótowaneje wustajeńce a za móžnosćami w ramiku wobgranicowanego městna, kenž tomu muzejoju k dispoziciji stoj. „Mamy nadawk, temy, kótarymž njejsmy mógali dosć městna daś, we wósebnych wustajeńcach wobšyrnjej pśedstajiś“, zgónijomy mjazy drugim wót Martiny Nowakojc. Dostanjomy teke wuglěd na jich pśiduce wósebne wustajeńce, a cytamy, z cym su se sobuźěłaśerje togo muzeja w casu lock-downa zaběrali.