Teke lětosa buźo w Casniku roman we wšakich źělach ako lěśojska lektura. Wón wjeźo nas do starych casow w měsće Chóśebuz. Wujšeł jo ako „Serbowka. Historiski roman z 15. stolěśa. Stawa se w Dolnej Łužycy. We nimskej rěcy spisał Boš-Fidus w Chóśebuzu. Z górnoserbskeje do dolnoserbskeje rěce pśełožyła Mina Witkojc. W Chóśebuzu 1927“ (te knigły drje njejsu wěcej dostaś).

Awtor Boš-Fidus, to jo był chóśebuski spisowaśel Friedrich Wilhelm Drabitius. Historiska nowela „Die Wendin“ z jogo pjera jo wujšła w lěśe 1865. Cogodla wón jo ju pód pseudonymom wózjawił, to njejo znate. Znate pak jo, až wóny Drabitius jo měł wšake wušparanja w zwisku z rewoluciju 1848. Wóna rewolucija jo se mócnje wustatkowała na dolnołužysku towarišnosć. Mjazy drugimi wudobyśami jo wjele lichotow za Žydow pśišło pó tej rewoluciji – a w zwisku z towarišnostnymi změnami jo se teke ten prědny dolnoserbski tyźenik ako „Bramborski Serbski Casnik“ załožył 1848.