Z Barlinja/Berlin. Pónjeźele, 7. junija, jo měła Parlamentariska pśirada Załožby za serbski lud swójo 67. pósejźenje. Za tym, až te slědne pósejźenja teje pśirady su se pśewjadli korony dla online , jo to tenraz zasej móžno było, až su se w domje Zwězkowego sejma w Barlinju zmakali. Wobźělili su se pódla cłonkow Parlamentariskeje pśirady mjazy drugim teke Zusan Šenkec, pśedsedaŕka Załožboweje rady Załožby za srebski lud, a Jan Budaŕ, direktor Załožby za serbski lud.

Na tom pósejźenju su se prědny raz dali do rozgrona ze zagronitym za pšašanja wusedlarjow (Beauftrager für Aussiedlerfragen) Bernd Fabritius (cłonk Nimskego zwězkowego sejma). Tematizěrowali su financny ramik za pśiduce lěto a pšašanje, co musy se malsnje pólěpšyś, aby serbska rěc se źaržała. Su se wobjadne byli, až stat musy malsnjej a lěpjej pomagaś, aby se luźi we regionje źaržali, aby njebyło jim trjeba, až wóni hynźi w Nimskej za źěłom pytaju.