Z Turjeja/Tauer. Južo wót zachadnego nowembra njejo wěcej móžno woglědaś do hotela „Christinenhof“ w Turjeju. Tu pśez pandemiju wunuzkanu pawzu jo jadnaŕka Nicol Wenkojc-Nieswandowa wužywała, aby organizěrowała pśenowjenje rumnosćow hotela. Pópšawem su planowali zasej wótwóriś w juniju, renowěrowanje wellnesowego wobłuka a 19 drugich śpow pak trajo a buźo se śěgnuś až do septembra. Rucnikarje wšakich firmow pśigótuju hotel a spa za cas pó pandemiji, a źaseś luźi personala pomaga pśi źěłach w cełem domje.

„Na zachopjeńku smy jano instalěrowali WLAN a nowy system za šćit pśed wognjom. Ako jo se pokazało, až njebuźo se korona-situacija pólěpšyś, smy w měrcu chopili wobšyrnje renowěrowaś“, groni jadnaŕka Wenkojc-Nieswandowa. Pó wjele lětach jo wóna se 2017 wrośiła do Łužyce, aby sobu źěłała w Christinenhofje a how pśigótowała pśewześe gósćeńca pśez nowu generaciju. Jeje starjejšej, Wenkojc Lothar a Christine, stej w lěśe 2001 załožyłej ten gósćeńc. Pśedzachadne lěto jo wumrěł jeje nan a Nicol Wenkojc-Nieswandowa jo pśewzeła familijowu firmu.