Z Pódstupima/Potsdam. Serbska rada jo se na 1. juniju zmakała. Wót cogo jo to grono było, kake su byli temy: To jo Nowy Casnik zgónił wót pśedsedaŕki teje rady, Kathrin Šwjelineje. Na dnjownem pórěźe su byli to pśedstajenje projektowu a rozpšawa Rady Załožby za serbski lud. Prědny projekt pśigótuju Serbski institut, BTU a Institut für heritage management (Institut za management derbstwa, IHM, kenž sejźi w Chóśebuzu). Projektoju se groni „Lausitzer Tagebaulandschaften als Weltkulturerbe“. Tam źo wó procowanje, wobchowaś brunicowe jamy a te pśeměnjone krajiny. Wšak su jamy a jich slědy južo 120 lět we Łužycy. Pśedstajiła jo to cełe Lea Brönnerowa wót IHM. Ten projekt dej pśiś na UNESCO-lisćinu swětowego kulturnego derbstwa, nejpjerwjej na lisćinu Nimskeje z projektami.